خلوا سرعة الوعي عندكو اكبر من سرعة سياراتكو- بقلم نادية صعب ترشيحا

اسمحولي انتقد ظاهرة مزعجة وعم بتضايق كثير من اللي حوالينا وما عم بيعبروا عنها بصوت عالي، وعدم التحدث عنها  بصراحة متناهية بيعطي الشرعية والمصداقية لهالاعمال المستفزة لبعض الشباب الطايشة.
"الرجولة" و "القبضنة".
مش بالتشحيط المهووس بعجال السيارات والحركات البهلوانية والاصوات المقززة اللي بتصدر لما حضرتك  تمشي على الشارع  بسرعة جنونية وتبرم عل الدوار رايح جاي كم مرة وكانك "ابو عنتر" ماسك بيلفونك تتصور وعلى "التيك توك" بتتغندر!
لشو هالضجة "العنيفة" اللي ما إلها  لا معنى ولا طعمة . ولو، انعدم الزوء عندك؟؟؟ اهلك ما ربوك عل القواعد  الاجتماعية السليمة؟؟؟؟
 ولَك  انتِ واياه ،
 في اطفال بدها تاخذ قسط من الراحة بتنقز فيهن وبيطلع صريخهن
ختيارية بحتاجوا للهدوء وما بصدقوا وينتى تغمض شوي عيونهن
اولاد بتلعب بالشوارع مبسوطة مع اصحابها وانت جاي تهدد وترعد حواليهن
ناس قاعدة على البرندات تتشرب فنجان القهوة عل الهدى
ومن هاللحظات الحلوة بتمنعهن
امهات بتحضر الاكل للعائلة وبتنط من الخوف يمكن واحد من الاولاد ركض قدامك وبتسرسبهن
ولمعلوماتك ، لما بتمرق زي الصاروخ بتهز المنطقة وبتزلزل
بتاكل مليون مسبِّه الك ولابوك ولامك ولاختك و...
مش عيب تحط حالك وعائلتك بهالموقف البايخ والمُخجل؟؟؟؟
مريض نفسانيا" روح تعالَج .
بدك استشارة مليان ناس مهنيين يرشدوك. 
بدك تثبت حالك روح إقرأ كتاب لصانعي التاريخ!
بدك تبرز، إخترعلك فكرة تزلزل العلم والمعرفة بدل الزلازل اللي بتعملها بسيارتك/ماطورك.
لشو هالتصرف الواطي؟؟؟
لشو هالتفاهات والسخافات والخزعبلات؟؟؟
استحوا عاد، بيكفيكن.
شبابنا أرقى وأعظم من هيك !
 نعم الرجولة.... أخلاقيات ، قيم ، مبادئ ،  مواقف ، تصرف راقي، ردود فعل  و تحديات لتخطي العقبات للوصول الى الانجازات  والاستمرار في البحث عن التقدم وتطوير الذات.
و"القبضاي"... بالتفكير العاقل والحكيم اللي ما بضر الآخرين
حتى يكسب الاحترام والتقدير، 
القبضاي اللي بدور على مساحه وبيحتلها لإثبات وجوده الايجابي بهالمجتمع، 
القبضاي اللي عنده الامكانيات للوصول الى اماكن ما وصلها غيره بالتحديات، 
القبضاي اللي بوقف وبصد التصرف والعمل السيء في بلده،
القبضاي اللي بدافع وبيعبر بصوت عالي عن قضايا محلية وعالمية ، 
 القبضاي اللي بجيب اقتراحات وافكار لتطوير مجتمعه المحلي، 
القبضاي اللي بهتم و بساعد اللي حواليه بدون ما يطلبوا،
القبضاي اللي بحافظ على نظافة بلده وما بكب الاوساخ بشكل عشوائي ولا بيخرب الاشياء وبيكسرها،
القبضاي اللي ببني مستقبله بدون ما يركن على غيره،
القبضاي اللي بفكر يشيل الهم عن عائلته وبروح يدور على شغل تيساعد في مصروف البيت " بهالايام المجنونة"،
القبضاي اللي بكون مستقل فكريا" وماديا" تيمشي مرفوع الراس بين الناس،
القبضاي اللي بدافع عن المقهورين والمظلومين والمنبوذين
ونقطة مهمة...
القبضاي اللي بحترم الصبايا الماشيات على الرصيف وما بيطلع عليهن بنظرات غير شكل وما بيألف قصص، حكايات ودعايات شي كان وشي ما كان، والقائمة طويلة.
فبلاها هالحركات وحياتك ، لانه الغلط ممنوع والعتب مرفوع .
فهمت يا "قبضاي"  اللي عامل حالك قبضاي وللا لازم انبهدلك أكثر؟؟؟؟